پہاڑ

کبھی اِک دور ہوتا ہے
شہنشاہ کی دُھوم ہوتی ہے
شہنشاہ کا اقبال بلند ہے
شہنشاہ کا اقبال بلند رہے
چار سُو یہ شور ہوتا ہے
اور تخت و تاج کے بوجھ تلے
دبے بُوزنے مالکِ کُن کہلاتے ہیں
شہر جلتے رہیں، لوگ مرتے رہیں
یہ راگ و نغمہ کی تانیں اڑاتے ہیں
سپاہ و سپر و تِیر و تفنگ
ان کے اشارۂ ابرو پہ جامد
تو جبیں کی شکن پہ قہر بن کر
حیات و موت کے درمیاں کے
لطیف پردے چاک کرتے ہیں
مگر!
اِک وقت ایسا بھی مقرر ہے شعور کی بیداری کا
رعونت سے کھڑے
پہاڑ بن کے سینۂ آدمیت میں گڑے
روئی کی گالوں کی طرح بےآسرا
اڑتے اڑتے ببولوں پہ دم توڑ دیتے ہیں