اچانک آنکھ کھلی، گھڑی دیکھی تو رات کے ڈھائی بج رہے تھے۔ کمرے میں خالی پن کا احساس ہوا تو گھبرا کر فیصل جاوید کو آواز دیتے دیتے رک گیا۔ خوش قسمتی سے یاد آ گیا کہ میں ایک بار پھر سے شادی زدہ ہوں اور بیگم بھی میکے نہیں گئی ہوئی ہیں۔ بیگم کو کمرے میں موجود نہ پا کر تھوڑا پریشان ہوا۔ واش روم کا دروازہ بھی کھلا تھا، تنہائی سے گھبرا کر لاؤنج میں آیا تو ایک پُرنور ہیولہ دیکھ کر گھگھی سی بندھ گئی کہ کہیں نیکی کا فرشتہ میرا حساب لینے تو نہیں آ گیا۔ غور سے دیکھا تو بیگم تھیں، ان کے چہرے کے پر نور دیکھ کر خوشی ہوئی لیکن پھر احساس ہوا بیگم تو میرے موبائل کی تلاشی لے رہی تھیں۔ ایک دم سکون کا احساس ہوا کہ شکر ہے اب میں بلیک بیری استعمال نہیں کرتا، لیکن پھر ایک دم یہ سوچ کر جان نکل گئی کہ اب سارے راز واٹس ایپ پر ہیں۔
فوراً دبے پاؤں بیگم کے پیچھے پہنچا تو یہ دیکھ کر جان نکل گئی کہ بیگم میری، مراد سعید اور حمزہ عباسی کی گروپ چیٹ کھولنے لگی تھیں، فوراً ہاؤ کیا کہ بیگم گھبرا کر موبائل پھینک دیں۔ بیگم نے ہاؤ سنتے ہی الٹا ہاتھ گھما کر میرے منہ پر مارا اور بولیں، اس کو کس نے گھر کے اندر گھسنے دیا، لاکھ بار خان جی کو کہا ہے کہ اسے گھر سے باہر رکھا کریں۔ تھپڑ لگتے ہی میری آنکھوں میں آنسو آ گئے اور میں روٹھ کر صوفے کے پیچھے جا کر بیٹھ گیا۔ بیگم آئیں، میرے آنسو دیکھ کر مجھے منایا۔ موٹو کو بھی ایسے ہی مناتی ہیں۔ بیگم برابری کے اصول پر سختی سے کاربند ہیں۔ مجھے اور موٹو کو کھانا بھی اکٹھے ہی دیتی ہیں۔ موقع دیکھ کر بیگم کے ہاتھ سے اپنا موبائل پکڑا اور کہا کہ آپ یہاں candy crush کھیل رہی ہیں، میں کمرے میں آپ کو مس کر رہا تھا۔ شکر ہے بیگم کا دھیان بدلا اور وہ کہنے لگیں، مجھے نیند نہیں آ رہی تھی تو سوچا کچھ لکھ لوں۔ اچانک منہ سے نکلا، بیگم ابھی تو ہماری طلاق نہیں ہوئی اور آپ ابھی سے ہی؟
اسی وقت دو آدمی قریبی الماری کے پیچھے سے نکلے اور بیگم سے اجازت طلب کرنے لگے، پوچھنے پر کہنے لگیں کہ یہ فرشتے ہیں ایک کا نام ٹیچی ہے اور دوسرا جو انگریزوں کی طرح لگتا ہے اس کا نام درشنی ہے۔ دونوں فرشتوں کی دست بوسی کرنا چاہی تو انسانوں کی ہی طرح لگے۔ درشنی نے کہا وہ یروشلم سے اہم پیغام لے کر آیا تھا اور اسے فوری واپس جانا ہے۔ رقت آمیز پلکوں کے ساتھ انہیں اجازت مرحمت کی لیکن حیرت ہے کہ وہ انسانوں ہی کی طرح چلتے ہوئے باہر گئے۔ معرفت کی باتیں ہیں، میری تو سمجھ میں نہیں آتی۔
بیگم کہنے لگیں کہ سو جائیں، صبح اسمبلی بھی جانا ہے۔ مچلتے ہوئے کہا کہ میرا دل نہیں کر رہا، میں نہیں جاؤں گا۔ جھڑکتے ہوئے بولیں، نوکر کی تے نخرہ کی۔ جانا تو پڑے گا۔ فوری طور پر صبح اسمبلی جانے کی تیاری شروع کر دی۔ سیکرٹری صاحب کے بوٹ پالش کیے، خوب اچھی طرح چمکائے حتٰی کہ اپنا عکس نظر آنا شروع ہو گیا۔ میں نے تو آئینہ دیکھنا ہی چھوڑ دیا ہوا ہے، آئینے میں خود کو دیکھ کر نہ جانے کیوں کراہت محسوس ہوتی ہے، شاید بوٹوکس خراب ہو گیا ہے۔ لیکن بوٹوں کے دائرے میں اپنا عکس اتنا خوبصورت لگتا ہے کہ کیا بتاؤں۔ بوٹ چمکا کر سو گیا۔
دروازہ کھٹکھٹائے جانے سے آنکھ کھلی تو حکم ملا کہ ہیلی تیار ہے، موٹو بھی بیٹھ چکا ہے، آپ کو بھی ساتھ جانا ہو گا۔ تسلی ہوئی کہ فواد چوہدری بھی ساتھ جائے گا۔ تیار ہو کر ہیلی میں بیٹھا، فوری طور پر ایک ہدایت نامہ میرے ہاتھ میں تھما دیا گیا۔ اس پر من و عن سختی سے کاربند رہنے کا حکم ملا۔ تعمیل کا وعدہ کیا۔ اسمبلی پہنچے تو حکم ملا کہ فوری طور پر اندر جاؤ۔ دروازے کے پاس جا کر میں نے عادتاً U-Turn لیا اور باہر کی طرف چل پڑا۔ یہ کم بخت عادتیں بھی ذلیل کروا دیتی ہیں۔ حلفیہ کہتا ہوں کہ یہ والا U-Turn عمداً نہیں تھا۔ اندر داخل ہوا تو خواجہ آصف کو دیکھ کر تراہ نکل گیا، فوراً باہر آ کر ترلا کیا کہ آج معافی دے دیں۔ کل آ جاؤں گا۔ کاش کل خواجہ نہ آئے۔
فوری طور پر ایک خفیہ دور کا بندوبست کیا گیا۔ دوبارہ ہیلی میں لاد کر ہیلی اڑایا گیا تو تھروٹک شروع ہو چکی تھی۔ منت سماجت کی کہ تھوڑی سی دے دو، صرف سونگھ کر واپس کر دوں گا۔ ستم ظریف نے ٹیلکم پاؤڈر سنگھا دیا۔ اگر ہیلی میں بوٹوں کی پالش کی مہک موجود نہ ہوتی تو شاید میری موت واقع ہو جاتی۔ لیکن میری سحری کی محنت نے مجھے بچا لیا۔ ہیلی ایک خفیہ مقام پر اتار کر میری آنکھوں پر پٹی باندھ کر مجھے کہیں لے جایا گیا۔ آٹھ گھنٹے تک مجھے وہاں رکھا گیا۔ کافی سخت سست کہا گیا، ناکامی پر بدترین نتائج کی دھمکی بھی دی گئی لیکن میں نے برا محسوس نہیں کیا، بھلا محسنوں کی کسی بات کا بھی برا مانتے ہیں۔ کئی لوگوں نے طمانچے وغیرہ بھی لگائے۔ میرا خیال ہے نواز شریف نے یہاں بھی اپنے بندے رکھے ہوئے ہیں، ورنہ اس سے پہلے بات گالم گلوچ تک ہی رہتی تھی۔
آٹھ گھنٹے بعد مجھے واپس ہیلی میں بٹھا کر گھر پہنچایا گیا۔ اترتے ہی ڈھیر سارے بوٹ میرے حوالے کر کے حکم دیا گیا کہ سونے سے پہلے لازمی پالش کرنے ہیں۔ پالش برش پکڑ کر بیٹھ گیا، بیگم نے ٹی وی آن کیا تو خبر آ رہی تھی کہ میں نے ایک اہم مقام کا دورہ کیا، جہاں مجھے اہم بریفنگ دی گئی۔
